Les arbres du Collège (3)

Publié le par Monique MERABET

17-Juin11.JPG

 

 

 

 

 

 

Tom la pèrd dann foré Maydo.

 

Kriké !...Kraké !...Na in jour Tom èk toute son famiye la parti fé piknik dann foré Maydo....

 

Zot la prépar in rougaye sosis boukané, pou fé rir zot boush. Laprémidi bannla la bate domino é zot la partaj inn ti paté kréol, sül koud katrër. Aprésa zot la ramas zot marmite, zot jë, pou artourn zot kaz.

 

Arivé dann parking, Tom i trouv pü son guèmboye. Son manman i di alü kour vite alé rodé. Lë garson i artourne koté le pié tamarin ousa zot la manjé.

 

Toudinkou son pié gosh i maiye dann in boi. Aiyayaiye!in koud konye !...Atèr devan lü na inn poigné an fèr i dépass... Lü fouiye èk in galé volkan, somanké lü trouv in trézor. Füramëzür lü grate, lü dégaj in léspès kès an boi. On diré in sèrkëye... La tranblad i monte sü lü. Lü ésèye sové mé lü gingn pa mèt in pié devan lote.

Dann son tète na inn ti voi i mürmür :

-''Vien aou, vien aou, vien !...''

La lü la moude poiv.

-''Ki...ki...ki... i apèl amoin la ?''

Sé la ke lü voi inn grote an lav noir. A koté navé inn ti fiye an rob noir. Son gran shëvë té gomé sanb la bou. Son dan gaté té jone kom safran...

 

Tom i suiv aèl dann fon la kavèrn... é la na in granne, granne glass i rëkouv toute le mür é dan la glass lü voi la figür son papa èk son manman. Sa lé blèm kom la mor. Tom la gingn fondshagrin. Son larm téi koul an kaskad le san...

Le tifiye té pü la. Lü té rète son tousël dann milië la grote. Lü lavé për, mé in moman doné, lü la gingn somèye...

 

Sül koud minui, in gran dézord la fé lèv alü. Inn rosh i déboul dëvan lü, é dan lë trou, nana le krane son dë paran.

Alapak dë zarégné i sorte par lë kanète ! Mashoir i klak... é in voi i pète an loraj é i guël dan son zorèye :

-''Alé rod la klé le sèrkëye ou la bate dëdan. Rouv alü, gliss aou dëdan é toute va rante dan lorde.''

 

Sito di , sito fé. Tom i pran son kouraj é i inspèk la foré pou lü trouv la klé. Solman foré Maydo la, sa lé gran... An plüss téi fé noir...

In moman doné, lü kroiz inn tralé mové zame i anbar alü shëmin . Lü kol son pti lanp éléktrik i marsh toultan sanb lü, é lü éklèr an o, an ba, a droite, a gosh, an plin sü le bann zame. Toute i fane an vitès.

Aprésa lü voi in zoizo bélié pri dann in gob, téi souplind kom inn tibaba. Tom la tir le gob. Le zoizo té lib é la di alü ousa lü téi pë trouv la klé : lété dann in ni bélié, pandiyé sü inn ti golète banbou.

Alorss Tom la süiv toute la bann mark lü lavé fé pou artrouv la diréksion lë sèrkëye, soul pié tamarin...

Lü la trap le ti klé...lü la mète dan la sérür. Klik... klak... Alala le kouvèrk i lèv ! Lü rekül an arièr... In gran momi, antortiyé dann in shifon blan, i mète dëboute an rikanan é i kour dérièr lü... Tom i done dü gaz dann shemin jüskatan lü la gagn kol inn tiboute lë linj le momi... Toute la déroulé kom in roulo papié toilète. Kan lariv oboute, léskëlète la tomb an poude. Tom la anprofité pou rante dann sèrkëye é lü la bien rabate le kouvèrk sü lü...

E zot lé pa péyé pou kroir : la fé kom in voiyage téléportasion : Tom i artrouv alü dan la kour kolèj Bèrnika, sou in pié rins bibron ! Navé in lékip sizièm 7 téi atand alü. Le bann ti bandi téi rod tüé alü koud poin, koud kouto karabiné... Rëzman lé dë fiye ladi va sov son vi si lü rakonte toute son zistoir.

Sa minmminm lë zistoir lü la rakonte anou...

 

Kriké, kraké...Koton may i flote, rosh i koul ! Si zistoir la lé mantër la pa moin lotër...


(Le deuxième conte que les enfants ont dit... en Créole. Ilaét mis en forme avec l'aide de Huguette et Monique)

Publié dans ARBRES

Pour être informé des derniers articles, inscrivez vous :

Commenter cet article