Tags... (X)

Publié le par Monique MERABET

Pic-Adam.JPG


                                                                                         (image Monique)

Pic Adam.

(Camille PAYET)

Oté, mi koné pa kosa i ariv amoin jordü. Dabitüd kan mi monte Pic Adam, mi arash an montan, mon kor  i done paké, i done le grin kom i di… mé la, moin la pa fine fèr 200 mèt, mi gingn pü déjà, mi pèrde lèr. Na  in problèm la, na in nafèr i kol pa, na in nafèr i tourne pa ron. Mon kèr i kongnkongn, boudoum, badaboum, komsi  lü vë pété dan mon léstoma. Ma lang, ma boush lé sèk… Mon gozié i brül, mon dë küis i porte pü moin, mon bann molé i kri tir, i fé la mas… Mi ramass pa mantèr sanm zot : mon kor lé an zobok, é kom lo viè Anatol i di, moin lé mol…

Zot i koné kosa i fo fé, kan le kor lé an bob kom sa…Zot i koné si le kariol i vë alé plü loin, i fo ménaj le bourik… Alorss, i rès a moin pou poz mon dérièr kèk par, é atann dë troi linstan pou arprann mon souf. I tonm bien, mi ariv lèr piknik Pic Adam nana dë troi kios èk le ban. Mi arète inn dë minüt pou fé pass mon mové kor.

Mi asiz sü le ban, moin lé malalèz, na poin arien pou kal mon do. Mi préfèr alonjé. Travèr bann bransh de boi kriptoméria, solèye i pète, le sièl lé blë. Lèr lé bon, lèr lé fré. Dann zèrb nana la rozé …tousa la… zot i koné la shanson ! Toute sa, arienk pou moin tousèl. Moin lé tousèl poud vré…

A !... in malrouj sü inn bransh lé antrinn vante an müzik son joli koulèr. Li arète pa karte son zèl pou pavané é sédüir le pti fëmèl in pë plu ba. Akoute… rouv zorèye…in zoizo shapo, in mèrl Maurice si zot i préfèr, pou rann jalou son bann dalon, i sif kom in klarinèt :

-‘’Oté bann zavëg, moin minm minm la trouv dérnié goyavié la sézon…lé dou, oui… mé sora pa pou zot bèk !’’

Inn la réponn alü :

-‘’An parlan dbèk, fèrm lavote, éspès goulapia ! Arète fé le vèr ! Toué la trouv ptète le dèrnié goyavié, mé jamé ton krète sera plü an nik ke la miène ! Jamé dla vi la koulèr rouj ton jabo va pète dë fë kom lamiène !’’

La koup son pti siflèt. Lë bataye la rète nèt…

 Mé le ban la, lé étroite oui foutor ! Mon pozision lé pa tro doss, lé pa konfortab kom i di. Tanto moin na in koté dbra i shap danl vid, tanto sé lot i larg le kor lot koté. Mi alonj sü la tab, mi tir in pë la parès, mi karte mon dë janm, mi rouv mon dë bra an kroi, komsa mon molès va pass in pë plü mië . Sü lë ban moin tè rouv mon dë zorèye, sü la tab mi karkiye mon kanèt astèr . E kosa mi oi sü bann plansh le kios ?... in ta linskripsion ékri , in pë èk in morso sharbon, lot pë èk in lame ti kouto. Mi li inn dë:

Mano, makro!... I komans bien…

A!... La o, mi oi…Pou kosa nou viv, si nou inm pa nou, le 9-10- 85, ThierryAlala in boug i sorte lordinèr. Ti mésaj la, la rale amoin, la fé réfléshir amoin…kom koi bann mo la lé for…na inn dë i ral aou vite par le ba, mé rëzman, na dote i arlèv in pë out léspri . Thierry la, la poz in bon kèstion, é sül  kou i fé pans amoin shanson not dalon Joron :’’Kosa nou lavnü fé, sa mi konpran pa. Ousa nou sava, sa mi koné pa’’. La fine ariv azot kan bann zidé sérië la, i rant dan zot koko, é lé malizé fé sorte azot ? Sa i tourn, i artourn, i sava, i arvien , i pétri out sérvèl… Alorss kom moin lé déja faye, mi préfèr kontinüé argarde an lèr…

O boute  lao, la ousa bann piès de boi i kroiz kom pou fé in parasol, mi oi gravé èk inn lame ti kouto 32 Dumas, moin lé sür, in kër bien désiné koz pa, èk inn flèsh anndan, é le pti fonnkèr la, ékri dsou :

A toi Nathalie, ma vie pour l’éternité. Le 21 11 08. Eric.

Pou gingn inn ti mésaj bien soigné komsa, é ékri dizon an lèr dann sièl, le pti fiye i vo sürman la pène, mi an doute pa… Mi fèrm mon dë zië é mi sèye majiné koman se Nathalie la i pë ète, kèl tournür èl i pë an avoir . Mi di azot toud süite,  mi oi pa devan moin in gro ton, in boudin èk in bouké la plüme shak koté la boush ! Non !!... Mi oi toud süite inn ti kanon, kom i di, inn bonm… bien roulé oui !...le dèrièr osi doss kë lë dëvan…avèk tou sad i fo la ou i fo !  Mi oi osi dë pti zië longani ki pète le fë, in bouké shëvë la soi, bien noir, i tonm sü son zépol.

Moin lé antrinn demann amoin si son manièr, son tourné viré y kol bien èk son lalür, kan, zot va pa kroir amoin, in joli pti madame i débark dë mèt devan moin, in kaskète rouj sü la tète èk inn këdsheval  i dépass par dérièr.  Lü avans, le kor an brèz, lü tourntourn koté la tab, lü pass par dérièr moin, é lü di :

-‘’Mi koné pa koman vi apèl, mé mi koné aou…Ou nana in bèl katkat vèr, ou ?…Nadfoi mi oi aou monte  Piton èk out ti shien rouj. Ou la pa mène ali jordü, don?’’

-‘’Non !’’, mi réponn aèl,’’lü trène in pë la pate, moin la lèss alü lakaz repoz in pë !’’

E mi san inn tite min tièd i pass dan ma tète, i trikote mé shëvë, i pass desü, i pass dësou. Dousman, dousman i karès amoin, i désan dan mon kolé, i shatouye amoin, i digdig amoin, i frolfrol mon po…léjé, léjé:  inn ti Jésus dann in gan vëlour… Oté baya, frison la monte an tapok sü moin, la fé la bute sü toute mon kor, in kouran la traverse mon rin. Le roi té pü mon kouzin. Mon kor la gate nèt. Mé le pti main téi pë pü désand plü loin, mon do èk la tab téi blok alü. Mi vèye aou  ma fiye koman ou sar débrouye out kari…

Ben le pti fiye la pa pèrde la karte, la pass par devan, la pass la min par le trou mon tishërte koté mon kou, é lü kontinü lë pti masaj. Dousman, dousman lü karèse amoin. Léjé, léjé, lü frolfrol mon po…

Mon dë pti boute tété la mèt gardavou kom solda Barachois 14 Juillet… E lü désand, lü désand minm.

Anvoiye aou manmzèl…talër oua büte sü inn tite sürpriz… Mi komans ronrone kom in mal matou, kan in gro voi lanfèr i kri :

-‘’Nathalie, éspès roulür, kèl trin ou lapré fé la ? Espès raklür ! Kisa i lé lë shinz alonjé koté dou ? Atand mi vien bate zot may, mi vien règ zot konte. Ma monte azot  kèl koté brinjèl i sharz !’’

 Mon san la glasé, mi kroi pa lü la ü le tan dfèr in tour.  In léto la sèr mon tète, la tranblad la monte sü moin . In grin la sab téi pass pü. Pa rienk poiv moin la moude se linstan la. Té !... kan le koloss, le larmoir a glass la aprosh kotéd moin, moin la pansé : moin lé foutü, mon poi lé o fë, mi sar aval ma küièr, mon dérnié lër la soné. Jésus, Marie, Joseph ! mi fé mon sign dë kroi . Mé malgré mon boush sèk é mon mashoir séré, mi gingn bégèye inn dë mo :

‘’-Oté, mon frar, pa bezoin pran la kolèr, kalm aou ! Lé pa sak ou kroi… Ma ésplik aou. Mon kor té si tèlman maf, Nathalie la mass amoin in pë pou armèt a moin daplon’’.

 In gro maniok! …in bèl marto sink doi!... la rive kom in koud kanon dan mon figure... Totosh !... la doulër !... la, moin la gouté, la… La, la trapé la! …

Mi tatetate mon figür. Mon né lé krazé, mon müzo, aplati kom müzo bouldog. Mi konte mon dan, mi trouve trante dedan, mé dë lavé rès sü la tab, zot ! Mi rouv mon zië… Mi artrouv amoin atèr, a pla vante sül siman lë kios, aplati kom inn sézi paye vakoa trésé.

Mi asiz, ma argarde a droite… a gosh… an lèr...an ba…partou. Moin lé tou sèl minm. Mi tate mon figür. Toute lé an orde. Mon né lé droite. Mon dan toute lé la. Moin lé jüs in pë mouyé. La për lë kou, la për la mor, la fé grinn toute lo mon kor.

 Le pti laré la, la rande amoin sérvise, la mète amoin an form. Mi boure vite an montan Piton… ratrap Nathalie…

Novembre 2009…La Petite Plaine…

Publié dans TAG

Pour être informé des derniers articles, inscrivez vous :
Commenter cet article
J

Joli texte en créole...

Amitiés de la Colline,
Joséphine.


Répondre
M

Merci Joséphine pour ton commentaire. La qualité du créole utilisé est remarquable et l'histoire est plaisante.