L'ané volkan la pa vnï abou koulé (7)
VII
Mé l’arivé
Konpèr Volkan la rouv son zië
Volkan la, lété bien rokinké dopïk lï avé rakomodé sanm son kamarade papang. Solman kan lï la bate in zië sï lo kalandrié, lï la grate lo bann brousay navé an frish sï son koko. Lï té dan in pozision lanbara a pa konète si té i falé mète lavan ou mète larièr.
- Oté Papang ! Moin lavé dan lidé sortir so moi-si. Mé astêr moin lé rante dë. Agarde sa in kou !
Lo papang lavé bo karkiy son pèr kanèt angran konm zasièt morlafin, lï té i oi pa arien pou sorte lordinèr. Toute bann somène té bien an ran èk zot litani lo Sin, bann dimansh èk jour férié té pasé an koulër.
Lo volkan la apïyé :
- La ! La ! Ou i voi pa toute bann pon la ?
- Bin oui, lé normal pou lo moi do Mé : na Promié Mé, na lo Ouite Mé, na Lasansion, na la Pantkote, épï, konm i ariv défoi, in fèt malbar, in fèt zarab i gliss anparmi. Na poin rien pou fé lèv lo mor dann tousa.
- Ou i di sa, ou ? Ou lé boushé ou koué ? Konm té i di Tatave Bénard, in gran saj nout péi, « Fé lo pon, la rivièr va vnir apré. ». Sanm pou moin, Papang, sitèlman nana lo pon, sitèlman do lo va dsann an katarak, an lavalass, an gro bouyon é sa lé riskab noiye nout toute.
- Mon Dië Singnër ! Mon pov Volkan ! Ou la manj rabato pou nir bèt konmsa ? Bann pon-la, na poin la ravine pou pass an-dosou. Sa i vë dir solman ke do moune i travaye pa, i arpoz plïss ke dan inn somène ordinèr. Tanka trouv la plui sé jour-si ! Na poin traka pou fé. Nou lé dan la sézon shès konm i di la météo.
- A bon ! alor, mi sar mèt mon soulié la lav vérni, é lès amoin larg lo kor pou moin koulé !
- Dousman, dousman, oté ! Koulé ? I guingne pa so moi-si.
- É kosa i sar anpèsh amoin fé sak moin la anvi ? Komandër La Plaine des Cafres la fé pass inn loi pou anbar mon shomin akoz mon figuïr sinonsa mon non i arvien pa lï ?
- Non ! Non ! Pran pa la kolèr ! Na poin pérsone i rode komann aou. Solman, ma ésplik aou in zafèr : dérnié dimansh lo moi i tonm La Fête des Mères. Sa in lokazion fé in kado pou lo bann moman, pou anbrass azot, pou fé in gaté èk zot. É ou, ou i sar pa fé lo méshan, ou i sar pa fé plër toute bann moman la Rénion akoz ou i anvoye in katakliss sï zot lantouraj ?
- Moman ? Kosa i lé sa, moman ? Ou na in moman, ou, Papang ?
- Sïrésértin moin nana in moman. Èl minm la songne amoin kan moin té ankor inn ti baba tann. Èl minm, la pran pasianse pou amonte amoin fé bate mon zèl pou vol dann sièl, èl minm la amonte amoin lo tiktak pou souk ti poul dann fon lo vérjé. Èl la liss mon plïme, èl la konsol mon groplëré lërk lo bann valal té i pourgal amoin sanm gro galé. Épï, èl té i shante pou fé dor amoin :
Fé dodo, mon joli zazakèl
Mon tourtrèl férm ton joli zië
Ton bèk lé plï roz ke sat zirondèl
Tï vol plï gayar k’in payankë.
- Bin ! Si out moman té i trouv aou joli, na poin pou dir, èl té i dëvé èt in moune bien sharitab. Ou, somanké èl lavé bezoin in pèr lïnèt ? Mi pouré fé in jès pou èl. Mé, di amoin, la Fête des Mères, la, sa i rogarde bann zanimo. Moin na poin pou samèl la-dan moin.
- Di pa sa ! Di pa sa ! majine in pë dann out tèt : lé sïr ou osi ou nana in moman. Sinonsa kisa noré fé pouss out gromass sï la tèr ? Ptète Piton des Neiges, out moman ? Fé travaye out léspri, kamarade, avank ou i fé in malër ou i soré kapak rogrété.
Lo tan Volkan la trouv lo boute èk toute lo bann késtion rasine, zansèt, toutsala… lo moi Mé la guingne filoshé konm in zanguiy rante lo doi péshër
létan.
(Photo communiquée par Claude Guillon)
VII
Mai arriva
Compère Volcan ouvrit les yeux
Le volcan était bien guilleret depuis qu’il s’était rabiboché avec son camarade papangue.
Cependant, quand il jeta un coup d’œil sur le calendrier, il se mit à se gratter les broussailles qui recouvraient sa tête. Il restait figé là, à ne pas savoir s’il devait avancer ou reculer.
- Oh ! Papangue ! J’avais projeté de sortir ce mois-ci. Mais maintenant, j’hésite. Regarde ça !
Le papangue avait beau écarquiller ses yeux en roue de loto, il ne voyait rien qui sorte de l’ordinaire. Toutes les semaines étaient bien rangées en colonnes, présentant leur litanie de saints, les dimanches et les jours fériés surlignés
Le volcan renchérit :
- Là ! Là ! Tu ne vois pas tous ces ponts ?
- Ben oui ! C’est habituel pour un mois de Mai : il y a Le Premier Mai, le Huit mai, l’Ascension, la Pentecôte et puis, il arrive qu’une fête hindouiste ou musulmane se glisse au travers. Il n’y a pas de quoi en faire un fromage.
- C’est ce que tu crois, toi ? Tu ne veux pas comprendre ou quoi ? Comme disait Tatave bénard un grand philosophe pays , « Construisons le pont ; la rivière va suivre ». Il me semble, Papangue, qu’avec cette quantité de ponts, l’eau va s’engouffrer dessous comme une marée, une cataracte, elle coulera à flots et nous risquons de tous périr noyés.
- Seigneur ! Mon pauvre volcan ! Tu te nourris aux aliments pour bétail pour pousser la bêtise aussi loin ? Sous ces ponts là, aucune ravine ne passera. Cela veut simplement dire que ces jours sont fériés et ainsi, on compte davantage de jours de repos que dans une semaine ordinaire. Quant à la pluie, ces jours-ci, il n’y a pas de souci à se faire. Nous entrons dans la saison sèche comme dit la météo.
- Ah bon ! Alors, je vais mettre mes souliers de lave vernis et… en avant pour une phénoménale coulée !
- Doucement ! Doucement, Compère ! Couler ? Tu ne peux pas ce mois-ci.
- Et qu’est-ce qui m’empêchera d’agir à ma guise ? Le commandeur de la Plaine des cafres aurait-il fait une loi pour me barrer la route parce que ma tête ou mon nom ne lui revient pas ?
- Non ! Non ! Ne te mets pas en colère ! Personne ne prétend t’imposer quoi que ce soit. Mais je vais t’expliquer : le dernier dimanche de Mai, c’est la Fête des Mères. C’est l’occasion d’offrir un cadeau aux mamans, de les embrasser, de les câliner… Tu ne vas pas jouer au méchant, tu ne vas pas faire pleurer toutes les mamans de la Réunion en leur envoyant un cataclysme sur le crâne.
- Maman ? Ça veut dire quoi, ça, maman ? Tu as une maman, toi papangue ?
- Sûr que j’ai une maman. C’est elle qui a pris soin de moi quand j’étais tout petit. C’est elle qui a eu la patience de m’apprendre à remuer mes ailes pour voler, c’est elle qui m’a appris à chasser les poussins au fond des vergers. Elle m’a peigné les plumes, elle m’a consolé quand les garnements me pourchassaient à coup de galets. Et puis elle chantait pour m’endormir :
Fais dodo mon joli bébé
Ma tourterelle ferme tes jolis yeux
Ton bec est plus rose que celui de l’hirondelle
Tu voles plus haut que le paille-en-queue.
- Eh bien ! Si ta maman te trouvait beau, il n’y a pas à dire, ce devait être une brave femme. Ou peut-être avait-elle besoin de lunettes ? Qu’importe ! Je peux faire un geste en son honneur. Mais, dis-moi, la Fête des Mères, là, ça ne concerne que les animaux. Je n’ai pas à m’en préoccuper.
- Ne dis pas ça ! Fais un peu remuer tes méninges. Bien sûr que toi aussi, tu as une mère. Sinon, qui aurait fait se dresser ta grosse masse sur la terre ? Peut-être que ta maman, c’est le Piton des Neiges… Fais travailler tes petites cellules grises, camarade, avant d’entreprendre quelque chose que tu pourrais regretter.
Le temps que le volcan vienne à bout de toutes les questions de racines, d’ancêtres… le mois de Mai avait filé comme une anguille entre les doigts d’un pêcheur de l’étang.